الجديد في إعادة مباراة مصر والكاميرون
بعد البحث في الموضوع والتواصل مع جميع الجهات المعنية
بخصوص الانذار الثانى للاعب الكاميرون ٠٠٠
فى حاجه اسمها (( تقرير رسمى )) بيقدمه الحكم بعد انتهاء المباره اللى هو بيحكمها ٠٠٠
الماتش بيخلص من هنا والحكم بيقعد يكتب التقرير بتاعه ويرفعه للجنه الحكام التابعه للاتحاد الافريقى ٠٠٠
اى لاعب بياخد انذار او بياخد طرد اسمه بيتكتب فالتقرير ده ٠٠٠
فى حاجه بقه اسمها اللجنه المنظمه للبطوله ٠٠٠
ودى من اسمها اهوه بيبان طبيعه عملها ٠٠٠
دى لجنه (( بتنظم التعاملات بين المنتخبات المشاركه فالبطوله وبين اللجان التابعه للاتحاد الافريقى )) ٠٠٠
وطبعا مش بتنظم العلاقات دى بالحداقه او بالدماغ ٠٠٠
فى (( قوانين )) اتحاد افريقى بتحكم عمل اللجنه دى ٠٠٠
المهم
اللجنه المنظمه للبطوله بتاخد التقارير بتاعه المباريات من الحكام ٠٠٠
وبتبلغ المنتخبات الافريقيه المشاركه بحالات الانذار او الطرد لكل فريق على حده ٠٠٠
يعنى تبعت لمصر بعد ماتش المغرب تقولها (( كهربا اخد انذار فى ماتش المغرب )) ٠٠٠
وتبعت لمصر تانى بعد ماتش بوركينا فاسو تقولها كهربا اخد انذار فى ماتش بوركينا ٠٠٠
ودورها بينتهى لحد هنا ٠٠٠
والله لو مصر شافت الخطاب اللى جالها وقالوا برضه هنزل كهربا يبقى براحتهم ٠٠٠
محدش هيقدر يمنعهم قبل الماتش ٠٠٠
بس بعد الماتش هيتم اعتبار مصر خسرانه طبعا وهتخرج من البطوله حتى لو كسبانه بسبب مخالفه قوانين الاتحاد الافريقى ٠٠٠
نيجى بقه للكاميرون :
الكاميرون لعبت فالدور الاول ٣ ماتشات ٠٠٠
واحد مع (( الجابون )) واتعدلوا ٠٠٠
وواحد مع (( غينيا بيساو )) وكسبوا ٠٠٠
وواحد مع (( بوركينا فاسو )) واتعادلوا ٠٠٠
وبعد كده الكاميرون صعدت (( للدور التانى )) ٠٠٠
ولاعبت السنغال (( وكسبوا بالبلانتيات )) ٠٠٠
وبعد كده لاعبت غانا (( وكسبوا غانا )) ٠٠٠
وفالاخر لعبوا النهائى مع مصر ٠٠٠
من (( قوانين )) الاتحاد الافريقى :
ان اى لاعب يحصل على (( انذار فالدور الاول )) وفريقه يصعد للدور التانى ٠٠٠
الانذار ده بيتلغى اوتوماتيك ٠٠٠
على اعتبار اننا يعنى هنبدا الادوار اللى بعد كده على نضافه ☺️٠٠٠
ومصر استفادت من الاوبشن ده مره واحده فالبطوله ٠٠٠
لما (( طارق حامد )) اخد انذار فالدور الاول ٠٠٠
و اخد انذار تانى فى (( ماتش المغرب )) ٠٠٠
ولعبناه معانا عادى خالص فى ماتش (( بوركينا فاسو )) ٠٠٠
وده طبعاً لان الانذار الاولانى اتلغى ٠٠٠
نيجى بقه (( للكاميرون وللمشكله المثاره )) :
لو دخلنا على موقع رسمى تابع للاتحاد الافريقى هنلاقى ان :
رسميا لاعب الكاميرون مكتوبله عدد (( ٢ انذار )) طوال مشوار الكاميرون فالبطوله ٠٠٠
ولما هنشوف اخدهم فين هنلاقى ان :
لاعب الكاميرون اخد انذار اول فى ماتش بوركينا فاسو ٠٠٠
والانذار التانى فى ماتش غانا ٠٠٠
فطبيعا الانذار الاول اتلغى والتانى بس هو اللى بيتحسب ٠٠٠
دول الاتنين انذار اللى (( رسميا )) اللاعب الكاميرونى اخدهم طوال ال ٦ مباريات ٠٠٠
وحط تحت كلمه رسميا ١٠٠ خط ٠٠٠
اومال ايه بقه كلام (( الجريده البرتغاليه )) :
الجريده البرتغاليه بتتكلم عن ماتش تالت خالص ٠٠٠
بتتكلم عن ماتش السنغال ٠٠٠
وبتقول ان فى فتره الاستراحه فى ماتش (( الكاميرون والسنغال ))
الحكم طلع انذار للاعب فى (( غرفه خلع الملابس )) لان اللاعب تصرف تصرف غير مقبول ففتره الاستراحه ٠٠٠
وبتقول كمان ان لما تم استكمال المباره الحكم (( نسى يكتب الانذار )) فالتقرير بتاعه ٠٠٠
طب الجريده البرتغاليه عرفت منين ؟؟؟
الله اعلم ٠٠٠
ممكن يكون ليهم مصادرهم ٠٠٠
والغالب انها غلطه صحفى برتغالى ٠٠٠
و عشان محدش يتعشم تانى عالفاضى ٠٠٠ 😔
فالموضوع اللى الناس بتكلم عليه من سحب اللقلب من الكاميرون مستحيل يحصل ٠٠٠
لان مفيش دليل رسمى ٠٠٠
الانذار اتاخد فى مكان مقفول ٠٠٠
مكان فيه فردين بس ٠٠٠
الحكم واللاعب ٠٠٠
و اللاعب طبعا لو جبناه وحلفناه على المصحف هيقول انه ماخدش انذار بين الشوطين ٠٠٠
واكيد الحكم برضه لو تم سؤاله مش هيغلط نفسه ويقول انه حكم مسطول نسى يدون الانذار ٠٠٠
ولو حتى افترضنا ان الحكم طلع راجل محترم واعترف بغلطه ٠٠٠
وقال ان هو فعلا اداله انذار ونسى يدونه ٠٠٠
يبقى الكاميرون ملهاش علاقه بالليله دى كلها ٠٠٠
لان فى حاجه اسمها (( مخاطبات رسميه )) بين اللجنه وبين المنتخبات المشاركه ٠٠٠
مش مخاطبات شفهيه ٠٠٠
للاسف الكاميرون موقفها قانونى ومعاها ورقه تحميها ٠٠٠
الورقه اللى مبعوتلها من اللجنه المنظمه للبطوله وبتقولها ان اللاعب ده ماخدش اى انذارات فى ماتش السنغال وبالتالى من حقكم تتنزلوه الماتش اللى بعد الجاى عادى حتى لو اخد انذار فالماتش اللى جاى ٠٠٠
فلو افترضنا ان الواقعه دى تمت فعلا فى غرفه خلع الملابس يبقى برضه فى اشد الحالات تفاؤلا :
الحكم بس هو اللى هيتعاقب مش الكاميرون ٠٠٠
الكاميرون هتتعاقب اخلاقيا فقط لاغير ٠٠٠
لان اكيد اللاعب بلغ مدربه انه خد انذار وانه متسجلش فالتقرير ٠٠٠
و اكيد برضه المدرب قاله يابنى كبر دماغك ٠٠٠
مدام الواقعه مكنتش (( انبابليك )) و متسجلتش فالتقرير يبقى سو وات ٠٠٠ 😃
صح كده....وهارد لك مصر
ردحذفبس حسب الماده 2من قانون الفيفا بتاع حماية المنافسه مينفعش حكم يحكم لفريق 3ماتشات قي بطوله واحده
ردحذف